Personaxes do entroido

Os alumnos de antropoloxía de 1º de BAC do IES Río Cabe, coordinados pola profesora, Flor Lemos, realizaron unha exposición sobre personaxes do entroido. Con este traballo, ademáis de dar a coñecer figuras como o Oso de Salcedo, os Troiteiros de Bande, os Merdeiros de Vigo, a Pita de Eiroás, ..., téntase facer unha reflexión sobre esta festividade.
Recolleron teorías sobre a súa orixe que van dende a idolatración de Carna, deusa das fabas e do touciño, pasando polas antigas celebracións na honra do deus do viño, Dionisos, as festas de tolos medievais, ata os ritos prehistóricos relacionados coa fertilidade das terras, mulleres e gando.
Tamén indagaron no seu significado antropolóxico facendo ver como esta festa simboliza a entrada nun novo ciclo no que se rompen os vellos esquemas do inverno e ofrece unha esperanza de vida.
Asimesmo reflexa o triunfo do público sobre o privado, fomentando a solidariedade e o esquecemento das diferenzas.
En definitiva, amosáronnos un entroido como tempo de excesos, momentos festivos, símbolo da vida e fertilidade, esceario de burla e crítica social e política e como inversión da normalidade cotiá.


Publicado por Flor R. Lemos e Xurxo R. Labrador

0 comentarios: