"HORARIO" NA BIBLIOTECA

Como xa anunciamos o 25 de Novembro, un numeroso grupo de alumnos de BAC puideron ver na Biblioteca a obra dirixida por Manuel Lourenzo e interpretada por Nuria González e Diana Sieira: "Horario"; adaptación dun texto de Begoña Muñoz Saa.
Como podedes deducir polo cartel que nos fixeron chegar, as horas do día marcan o ritmo dunha historia na que unha muller recibe maltrato psicolóxico por parte do seu home.
As dúas actrices de Grávida Teatro interpretaron estupendamente a anguria, os medos, os sentimentos contradictorios, a loita diaria... dunha muller (elas dúas eran unha soa) na súa rutina diaria; voces que tamén interiorizaban a presenza abafante do home opresor.

Logo da súa actuación, entablamos unha conversación sobre o significado de varios símbolos da obra, a orixe desa representación a partir do texto escrito... algunha alumna preguntou sobre onde están os límites. do maltrato, outros opinaron sobre a pertinencia de reflexionar sobre estes temas.
En definitiva, un exercicio de cavilación (que organizamos conxuntamente Normalización Lingüística e Biblioteca) para un tema que non pode deixarnos indiferentes.